Tapio Kostet: Sirkkoja pyethiin vasitulla katiskolla ja pyethiin sitten harria rantapyöilä mihinkä sirkat panthiin koukhuin pyyöksi. Seki sitten kielethiin.
Veikko Pahajoki: Palsan laijan tyypilisessä vesikuopassa on varsinhainen planktonilaboratorio. Elläinplanktonit on siinä niskan päällä eikä liivaa pääse tulemhaan. Tätä elläinplanktonia sanotaan "sirriäisiksi" Joskus on ollu pakko käyttää sitä kahvivetenäki. Kaikki ei siihen pysty ko sirriäiset uiskentelevat nykähyksittäin siinä.
Birger Winsa: Hevosaikana sorot oli paljon hoikemat. Minun isän kans hakkasima mettätraktorile, mutta kuska valitti ette isä hakkasi liian kaitasia sorkoja. Traktori ei mahtunu pölkkyläjitten välistä.
Sosiaalinen rakene on ajattelun stryktyyri jossa ei ole tietheelistä pohjaa. Raha esimerkiks on sosiaalinen rakene koska siinä ei ole yhtään arvoa. Valtio takkaa vain noin 100 000 kruunun arvoa. Meän luottamus rahasysteemhiin rakentaa sitä sosiaalista tyhjyyttä. Sama on kielensuunittelussa jos luothaan sääntöjä jossa ei ole tietheelistä pohjaa. Esimerkiks poistaa d, b ja g meänkielestä. Sillon sen sosiaalisen rakentheen ajatus on ette rakentaa kuvittelu suomen kielestä ja sen kulttuurista ette se ei ole osana meänkielistä kulttuuria. Rajarasismiks sitä rakenetta kuttuthaan Haaparannala.
Joka syksy noin 10-14 vuotiaat lapset spiuneerasit joukoissa. Keskikyläläiset spiuneerasit ala- eli ylipääläisiä. Kaikila oli fikklamppu, joilaki 5-6 batteria pitkä. Ja leikissä ei ollu päätä. Spiuneerathiin vain. Tzvote ja toiminta oli yks ja sama asia. Leikin tavote on leikki itte. Ja välistä varastethiin vaikkapa muuruuttia kryyvimaasta. Mäen Einari menetti kohta koko muuruuttimaan spiuneerinkin aikana kun spiunit halusit enemän jännää. Sitten menthiin mettäkämphään mikä oli esimerkiks koulun lähelä, Pikkumettässä. Minkä 5-6 luokan pojat olit rakentanheet kyläsahan rimoila. Sielä oli kynttilävalo, pikku kamiini ja sinne saattoi tulla tyttäriä jokka kans halusit jännää. Pojat ei oikein aina tienheet mikä se on se jännä ette olla tyttäritten kans, mutta jännää se silti oli. Alethiin huomaamhaan seksin voimaa.